Prvo mladunče pande rođeno u Francuskoj, Juan Meng, proslavilo je prvi rođendan uz tortu napravljenu od bambusa, meda, jabuka, pomorandži, jagoda i limuna. Juan Meng ima oko 30 kilograma i nedavno je počeo da jede bambus, ali i dalje uzima mlijeko od svoje majke Huan Huan.

Povodom proslave rođendana pande, ulaz u Zoološki vrt u Bovalu, južno od Pariza, besplatan je za sve posjetioce koji su rođeni 4. avgusta.

Huan Huan je vještački oplođena sjemenom partnera Juan Džija, a obje pande su u Bovalu na desetogodišnjoj pozajmici iz Kine.

U Evropi džinovske pande trenutno imaju Austrija, Velika Britanija, Belgija, Francuska, Njemačka, Holandija, Španija i Finska.

Prva dama Francuske Brižit Makron, koju smatraju “kumom” pande, nije prisustvovala današnjoj proslavi. Ona je u dva navrata posjetila mladunče pande.

Brižit Makron je objavila ime pande na ceremoniji u decembru u Zoološkom vrtu u Bovalu.

Izvor:Cdm