Izraelski Ratni kabinet danas će raspravljati o odgovoru na napad koji je Iran izvršio na tu državu u subotu.

Kako prenosi Anadolija, sastanak će biti održan u 14 sati po lokalnom vremenu. Ratni kabinet i u nedjelju razgovarao o odgovoru Iranu, a izraelski mediji su objavili da članovi tog tijela imaju različite stavove o odgovoru Teheranu, kao i da nije bilo moguće postići konsenzus. U vijestima je navedeno da su se članovi Ratnog kabineta saglasili oko odgovora Iranu, ali da su imali različite stavove o tome kada i kako odgovoriti. Izrael je 1. aprila izveo vazdušni napad na zgradu iranskog konzulata u Damasku, u kom je poginulo sedam ljudi iz Armije iranske revolucionarne garde, uključujući dva generala.Iran je tada najavio da napad na konzulat znači napad na teritoriju zemlje i da će uzvratiti. Iran je u subotu uveče započeo napad na Izrael sa stotinama bespilotnih letjelica kamikaza, balističkih i krstarećih projektila. Izrael je naveo da su većinu napada spriječili sistemi protivvazdušne odbrane, ali je jedan od projektila pogodio vojnu bazu na jugu zemlje.

Izvor: MINA

Foto: EPA