Kraj svih spekulacija kada je u pitanju klupa engleske reprezentacije - Tomas Tuhel je postavljen za novog selektora Gordog Albiona.
Njemački stručnjak (51) će tako postati treći selektor Engleske koji nije Englez nakon Svena Gorana Eriksona i Fabija Kapela.
Garet Sautgejt je napustio kormilo reprezentacije nakon poraza u finalu EURA od Španije.
Nakon toga klupu je preuzeo selektor U21 tima Li Karsli, ali koji je zaposlen kao privremeno rješenje i vođenje ekipe tokom Lige nacija.
Tuhel je već radio u Engleskoj, kao trener Čelsija sa kojim je uspio da osvoji Ligu šampiona.
Posljednji angažman mu je bio u Bajern Minhenu prošle sezone.
"Ponosan sam što sam dobio priliku da vodim Englesku. Osjećam posebnu povezanost sa igrom u ovoj zemlji, a voditi reprezentaciju je velika privilegija i šansa da sarađujem sa sjajnom grupom talentovanih fudbalera". kazao je Njemac nakon što je i zvanično postavljen.
Osim Čelsija i Bajerna, Tuhel je vodio i Majnc, Borusiju Dortmund i PSŽ.
Izvor: RTCG
