Petar Grašo, pop pjevač iz Splita, godinama je u vrhu liste najpoželjnijih muškaraca u regionu. Visina, šarm i harizma, donijele su mu hiljade obožavateljki kada se pojavio sredinom devedesetih. Iako više nije tako aktivan na sceni kao ranije, Grašova popularnost među damama nije opala, a izgleda da mu i godine “idu na ruku”. 

Tvrdi i da mu nije jasno zašto žene za njim vrište.

“Nikad se nisam doživljavao kao seksi, mačo tip. Nemam ‘pločice’ na stomaku, ne boravim u teretani po četiri sata dnevno i živim običan život prosječnog muškarca, ali veoma sam romantičan. Ne treba prelaziti dozu patetike i sladunjavosti, ali mislim da je lijepo biti romantičan”, priča Petar. 

Svojevremeno se našao u situaciji da je imao obožavateljku iz Makedonije koja je odlučila spavati ispred njegove kuće dok je on bio na turneji.

“Prijatelji su me zvali da mi kažu da netko kampuje ispred moje kuće. Kad sam stigao, riješili smo to na lijep način. Pozvao sam je u kuću i pokazao joj da sam samo čovjek te da želim svoju privatnost. Nakon toga je otišla, a ponekad mi napiše pismo. Udala se i ima dvoje djece. Ovo nije priča s kojom sam se samo ja susreo u životu. Vjerovatno većina onih koji su medijski eksponirani prolaze kroz to”, objašnjava pjevač.

Često ističe da ne prati svaki trend, pa tako nije obožavatelj društvenih mreža.

“Golotinja je danas 90 posto svega, paket je mnogo važniji od same forme. A ja smatram da je muzika najvažnija. Poenta muzike koju pjevam je da spaja ljude”, zaključuje pjevač.

Izvor: CdM/100naj.com