Oko 600 majki troje ili više djece, koje su ranije raskinule ugovor na određeno vrijeme zarad doživotne naknade i koje su nakon što je ona ukinuta ostale bez primanja, moći će da ostvare pravo na novu vrstu primanja.

Pobjeda piše da je to propisano izmijenjenim Zakonom o izvršenju odluke Ustavnog suda Crne Gore od 19. aprila o kojem se u srijedu polemisalo na skupštinskom Odboru za zdravstvo, rad i socijalno staranje.

Ministar rada i socijalnog staranja Kemal Purišić objasnio je sadržinu predloženog zakona, ističući da je akt promijenjen zato što ta kategorija žena nije bila pravno prepoznata, jer je prošle godine nakon ukidanja naknade po osnovu rođenja troje ili više djece uvedena nova vrsta primanja samo za one korisnice koje su imale ugovor na neodređeno vrijeme.

“Na ovaj način se sada u potpunosti izjednačavaju u pravnom status”, rekao je Purišić.Prema predloženom zakonu, majkama će se retroaktivno isplatiti naknada, počevši od 30. juna prošle godine.

izvor: mina