Premijera predstave ,,Siročad” 2. septembra u Centru za kulturu

Predstava ,,Siročad", rađena prema tekstu britanskog autora Denisa Kelija, u produkciji Bjelopoljskog pozorišta i režiji Zorana Rakočevića, održaće se u utorak, 2. septembra, u velikoj sali Centra za kulturu „Vojislav Bulatović Strunjo“, sa početkom u 20 sati.

U predstavi igraju: Pavle Novaković, Anđelija Rondović i Nemanja Todorović. Scenografiju potpisuje Milivoje Mićo Kovačević. Producent predstave je Edin Smailović.

,,Siročad" je snažna, psihološki slojevita drama koja postavlja uznemirujuća pitanja o porodici, nasilju i granicama morala. U središtu priče nalazi se mladi bračni par čiji se odnos urušava kada njen brat jedne večeri nenajavljeno upadne u njihov dom — događaj koji pokreće lanac otkrivanja potisnutih trauma i mračnih porodičnih tajni. Keli u ovom tekstu servira savremene evropske društvene tenzije: rastuću ksenofobiju, vidljivo i prikriveno nasilje koje tinja ispod površine svakodnevnog života, kao i sve krhkije porodične veze u nesigurnom svijetu. Upravo zbog tih tema, "Siročad" snažno odjekuje u savremenom trenutku. U vremenu obilježenom sve učestalijim aktima nasilja, rastućim nepovjerenjem prema "drugom i drugačijem", te migrantskim krizama koje testiraju granice solidarnosti, ova predstava otvara prostor za društveni dijalog i preispitivanje lične i kolektivne odgovornosti”, navode u saopštenju.

Dodaju da je predstava realizovana u okviru profesionalne produkcije Centra za kulturu „Vojislav Bulatović Strunjo“.

Predstava se izvodi kamerno, pa je broj mjesta za publiku ograničen na 100.

Besplatne ulaznice dostupne su na biletarnici Centra za kulturu na dan premijere, od 19 do 20 sati.

 

Izvor i foto: JU Centar za kulturu „Vojislav Bulatović Strunjo“.