Stručnjaci kažu da je veoma teško analizirati elemente koji čine jednu kožu lijepom, prozračnom, blistavom, a da se sve to primijeti na prvi pogled. Međutim, ono što se dešava u dubljim slojevima, obično primijetimo kad se na površini počnu pojavljivati znaci opuštenosti, kad koža počne da puca, crveni, svrbi, kad postane hrapava, peruta se, ljušti i kad se počnu pojavljivati prve bore.
Ovo je proces starenja kože, kaže za portal Radija Bijelo Polje, kozmetičarka Slobodanka Bubanja.
“Pojava bora, njihov izgled, dubina i debljina, uvelost kože, isušenost, kapilari, perutanje i crvenilo, simptomi su koji karakterišu dehidriranu kožu i na njihovu pojavu utiču različiti faktori kao što su nasledje, lučenje hormona, metabolizam, način života, nedovoljna i nepravilna njega, sunce, vjetar, a naročito nagle promjene temperature. Tada dolazi do promjena u dubljim slojevima kože, koje vremenom postaju vidljive i na površini. Ako nije brižljivo njegovana i navlažena u dubokim slojevima, koža brzo gubi vlagu, a kao posljedica dehidratacije, pored već navedenih promjena, tonus slabi, koža postaje neelastična, bez sjaja i svježine, oslabljena je mikrocirkulacija i dopremanje hranjivih sastojaka, pa koža djeluje suvo, umorn i uvelo”, ističe Bubanja.
Kad koža počinje da stari?
Zapravo, od rodjenja količina vode u koži se spontano i postepeno smanjuje, udaljavajući je od njenog idealnog stanja. Ovaj proces počinje da se primjećuje poslije tridesete, a naročito je vidljiv poslije četrdeset pete, kad se zbog naglog pada ,,hormona mladosti“-estrogena, mijenja kvalitet čitave kože, kad se bore javljaju naglo, u veoma kratkom vremenu a koža postaje neelastična, suva, tanka i krta. U ovim slučajevima, često dolazi do hiperpigmentacije koja je uvijek više izražena kod suve kože. Osim ovih, mnogi problemi sa kožom postaju veći ako koža nije adekvatno njegovana, nahranjena, navlažena i zaštićena. Uz malo truda, svakodnevne njege, znanja i strpljenja, može se sačuvati blistavost kože, koja je obično znak dobrog zdravlja i raspoloženja. Treba kombinovati tretmane i koristiti preparate koji poboljšavaju vlažnost, ujednačenost površine kože, njenu debljinu i prokrvljenost, te obezbijeđuju lijep i blistav ten, bez obzira na godine starosti. Zbog toga, pored redovne njege i dubinskog vlaženja u kozmetičkom salonu, za kućnu njegu, koja je nastavak održavanja kompletne njege, potrebno je koristiti preparate koji obezbjeđuju dubinsku hidrataciju. Osim njege, neophodno je piti puno tečnosti i čuvati kožu od prevelikog i nekontrolisanog izlaganja suncu, savjetuju u beauty centru “Estebel”.
Preparati koji se preporučuju za kompletnju njegu
Za dubinsku hidrataciju i održavanje svježeg izgleda kože, bez obzira na godine starosti i godišnje doba, idealne su i nezamjenjive morske alge, plankton i hijaluronska kisjelina, za sva stanja gdje je izražena suvoća kože i sklonost pojavi bora. Ove kreme obiluju mineralima, vitaminima, proteinima i elementima za vlaženje, koji vraćaju sjaj i elastičnost dehidriranoj koži i štite je od prevelikog isušivanja. Kod isušivanja kože, do problema dolazi zbog dezorganizacije lipida u međućelijskom vezivnom tkivu, koji treba da je štiti od nepovoljnih uticaja spolja i od prevelikog isparavanja vode iz kože.
Plankton, alge i hijaluronska kisjelina, osim toga što vlaže duboke slojeve kože, odlažu i usporavaju proces starenja i nastajanja bora. Ovim preparatima se nadoknađuju elementi koje je koža potrošila, a koji su neophodni za normalno funkcionisanje i održavanje njene vlažnosti. Za profesionalnu njegu u salonu postoji mnogo metoda kako preparativnih tako i aparativnih, koje su u službi borbe protiv prevelikog isušivanja, stvaranja bora i pripreme kože za ljeto. Većinu ovih različitih metoda treba kombinovati, jer u tom slučaju daju najbolje rezultate i čuvaju kožu. Osnovno pravilo koje treba poštovati jeste da se naizmjenično kombinuju preparati i aparati, da bi se postigli dobri rezultati. Iako kozmetičke kompanije ulažu ogromna sredstva da pronadju eliksir mladosti, ipak je pravilna njega najjači faktor održavanja mladalačkog izgleda kože.
Za one kojima su se bore već pojavile, savremena kozmetologija se pobrinula da odloži vidljive znake starenja. U ovim slučajevima, nije dovoljno samo dubinsko vlaženje, već je neophodna i ntenzivna njega hranjivim kremama koje sadrže visok postotak kolagena, elastina i proteina koji vezuju vodu i potpomažu održavanje vlažnosti kože. Upotreba vitamina A,C,E i betakarotina, polivitaminska i hormonska terapija, izbjegavanje alkohola, nikotina i nezaobilazna šetnja na svježem vazduhu, takođe su sastavni dio njege.
Specijalni kozmetički tretmani koji odlažu i usporavaju proces starenja kože i nastajanja bora su tretmani retinolom, kavijarom, kolagenom i hijaluronskom kisjelinom kao ciljana terapija, dok je za peglanje postojećih bora, sve popularniji biljni botoks. Za ukupan proces podmladjivanja i borbu protiv starenja kože, IPL aparat je nezaobilazan i nezamjenljiv.
Osim IPL-a i RF-a poznatog kao radiotalasni lifting, mezoterapija aparatom, kojim se preparati potiskuju direktno u kožu bez agresivnosti i povređivanja, u širokoj su upotrebi. Ove tretmane je neophodno periodično ponavljati da bismo održali nivo hranjivih sastojaka u koži. Nakon njih koža djeluje mladje, ten postaje čistiji i bez fleka, sitne bore nestaju a sprečava se nastajanje novih, dok se cjelokupno stanje kože poboljšava. Osim uočljivog kozmetičkog učinka, koža postaje manje osjetljiva i na nepovoljne klimatske uslove, naglašava kozmetičarka Bubanja.
